Founda en 1854 pèr Frederi Mistral
Despièi sis óurigino li mai anciano (1323), li Jo flourau an pèr toco
de manteni e d’enaura la lengo d’O.
Lou Felibrige, fort d’aquelo tradicioun, prepauso de sèt an en sèt an, despièi 1878, un councous literàri marcant raport à l’impourtanço, au noumbre e à la valour dis obro presentado.
Es en 2025, pèr la Santo-Estello de Sant-Troupès, que sara prouclama lou paumarés di Grand Jo flourau setenàri dóu Felibrige. Soun Grand Laureat aura l’ensigne ounour de chausi la vint-e-dousenco Rèino dóu Felibrige !
Alor zóu, à vòsti plumo !
Dounas d’ande à l’ispiracioun ! Leissas courre la creacioun ! Fasès viéure la lengo d’O !
Mistral, foutougrafìo e cianoutipe, Caroline Malatrait, 2023
Reglamen di
Grand Jo flourau setenàri
dóu Felibrige
de 2025
Article 1 :
Soun óuficialamen dubert entre lis escrivan, lis autour-coumpousitour e realisatour de lengo d’O, li Grand Jo flourau dóu Felibrige pèr l’an 2025 à la dato dóu 20 de mai 2024.
Article 2 :
Aquésti Jo flourau, tóuti, encarta o noun au Felibrige, an dre de ié partecipa, franc di felibre majourau, pas meme souto un autre noum o séudounime literàri.
Lis obro guierdounado pèr un autre prèmi noun saran pas retengudo. La jurado se gardo lou dre de leva de la targo d’obro qu’aurien davera un prèmi après soun iscripcioun.
Article 3 :
Li targaire se faran marca pèr cado obro presentado dins l’uno di seicioun seguènto :
Seicioun A : Pouësìo
Seicioun B : Proso
Seicioun C : Tiatre
Seicioun D : Estùdi
Seicioun E : Pedagougìo e didactico
Seicioun F : Reviraduro
Seicioun G : Cansoun
Seicioun H : Lèu-vist (clip), filme o diapourama sus suport numeri
Seicioun I : Literaturo jouinesso (album, asatacioun, conte musicau e bando dessinado)
Seicioun J : Jouinesso
Lou meme targaire poudra se faire marca dins diferènti seicioun, mai un cop soulamen pèr seicioun, franc de la seicioun J mounte poudra manda mai d’uno realisacioun. Uno memo obro poudra pas èstre prepausado dins de seicioun diferènto.
La seicioun J es duberto en tóuti li targaire qu’auran 18 an lou mai dins l’annado di Jo flourau. Poudran presenta sis obro à titre individuau o à titre couleitiéu, que siegue de pouësìo, de proso, de tiatre, d’estùdi, de cansoun, de lèu-vist, de filme, de diapourama, o encaro de literaturo jouinesso.
Article 4 :
Tóuti li gènre saran amés, li sujèt libre, emai tóuti li parla de lengo d’O saran aceta e tóuti li grafìo, basto la lengo emplegado coume la grafìo s’endevèngon l’uno e l’autro couërènto e recouneigudo pèr l’usage, ço que coustituïra uno coundicioun d’à-founs necessàri. I’a ges de limitacioun dins lou noumbre e/o la loungour dis obro presentado, pamens déuran èstre relativamen counsequènto.
Noun poudrien èstre retengudo d’obro que depèr soun countengut farien escorno i valour essencialo de l’Ome que soun lou respèt de l’Autre dins si diferènci d’óurigino, de biais d’èstre, de pensa o de viéure, en coustituïssènt ansin un mancamen gréu i valour aparado despièi sa foundacioun pèr lou Felibrige. N’es tout parié dis obro que farien usanço d’un voucabulàri mau-voulènt e groussié, contro-venènt i valour de Parage e de Gai-Sabé, foundamento d’aquelo targo literàri.
Article 5 :
Lis obro presentado poudran èstre : siegue d’obro inedito, siegue d’obro editado. Pèr aquésti darriero, l’edicioun noun déura remounta à mai de sèt an. Saran rebutado lis obro deja courounado pèr d’àutri Jo flourau o d’àutri prèmi literàri.
Article 6 :
Lis obro en targo déuran èstre dignamen presentado e mandado en tres eisemplàri papié e/o en versioun numerico, fauto de que saran rebutado au moumen meme de l’iscripcioun. Saran tambèn rebuta li plagiat, o recouneigu coume tau pèr la jurado.
Article 7 :
Lis obro saran mandado pèr courrié poustau au pus tard lou 31 de desèmbre 2024 à :
| FELIBRIGE Parc Jourdan 8 bis, avenue Jules Ferry 13100 AIX-EN-PROVENCE |
E/o pèr mèl dins lou meme delai :
Saran acoumpagnado d’un reglamen de 20 éurò pèr cade targaire au titre di frès d’iscripcioun (chèque à l’ordre de : FELIBRIGE / un RIB poudra èstre manda sus demando). Li targaire de la seicioun J n’en saran dispensa.
Lou secretariat dóu Felibrige n’acusara recepcioun pèr courrié-tournant.
Article 8 :
La jurado es coumpausado de sèt felibre majourau nouma pèr lou counsistòri, que poudran toujour s’ajougne, à titre counsurtatiéu unicamen, quau ié counvendra pèr juja dis obro presentado. Lou capoulié, o soun representant, presidara à sis acamp.
Article 9 :
Se decerniran tres prèmi pèr cado seicioun emai de mencioun en noumbre ilimita, que poudran pamens èstre reserva à la bono voulounta de la jurado. Noun se poudra decerni mai d’un prèmi o mencioun au meme targaire, senoun dins de seicioun diferènto à despart de la seicioun J. La naturo di prèmi decerni e di mencioun sara leissado à la discrecioun dóu counsistòri e dóu counsèu generau que n’auran establi li limito.
Article 10 :
Lis obro presentado i Jo flourau noun saran tournado i targaire, mai versado à titre definitiéu is archiéu dóu Felibrige.
Article 11 :
Li targaire restaran prouprietàri mourau de sis obro e gardaran tóuti li dre d’edicioun, de reprouducioun e de traducioun que ié soun restaca, franc d’aquéli de leissa bountousamen au Felibrige, à soun agrat, la priourita pèr soun edicioun, fuguèsson jamai estado editado.
Soulet lis autour guierdouna poudran se prevalé de soun prèmi pèr la coumunicacioun.
Article 12 :
Li proumié prèmi di seicioun A, B, C, D, E, F, G, I, se soun felibre, saran prouclama mèstre en Gai-Sabé. Demié éli la jurado noumara lou grand laureat di Jo flourau.
Lis obro escricho à dos man saran acetado e poudran èstre premiado. Mai sis autour poudran pas pretèndre, lou cas toumbant, à l’atribucioun dóu titre de mèstre en Gai-Sabé, nimai à sa nouminacioun de grand laureat.
Au targaire qu’empourtara lou proumié prèmi de la seicioun J, ié sara decerni lou Prèmi Frederi-Mistral de la Jouinesso.
Article 13 :
La prouclamacioun dóu paumarés sara facho pèr lou capoulié dins uno sesiho soulenno e publico au coungrès de la Santo-Estello 2025 e lou raport di Jo flourau sara legi pèr un di membre de la jurado. Es dóu tèms de la memo sesiho que sara prouclama lou Prèmi Frederi-Mistral de la jouinesso, e que lou grand laureat aura lou privilège de chausi quatecant, emé l’acord dóu capoulié e de la jurado, la XXIIenco rèino dóu Felibrige.
Article 14 :
S’adurra ges de moudificacioun au presènt reglamen.
Reglamen adouba pèr la coumessioun di Mèstre en Gai-Sabé.
