Maiano, lou 10 de setèmbre 2023
193en anniversàri de la neissènço de Frederi Mistral
Jour de fèsto ! Jour de fèsto que de celebra la neissènço de Frederi Mistral, aqui, au cor de la Prouvènço, dins soun vilage de Maiano. Jour de fèsto, capoulié di capoulié, de se souveni de l’ome que fuguerias, de l’obro qu’avès coumplido e de l’enavans coungreia. En mars passa, aviéu di à-n-aquelo meme plaço : « vesès Mèstre, noun, lou Felibrige a pancaro tout di. Soun cor bat. Fort. Fièr. E libre ».
Liberta ! En aquelo pountannado de rintrado escoulàri, sian tóuti clafi d’espèr nòu. Pourtan tóuti de vot e sian noumbrous de se proumetre d’assaja de faire « miés que l’an passa ». La rintrado de setèmbre, es coume lou proumié de janvié, uno dato pleno de proumesso.
Pèr li felibresso e li felibre, pèr li femo e lis ome que de proche o de luen se retrobon dins lou Felibrige, aqueste roumavage de setèmbre es veni se retrouba – noun pas soulamen pèr se souveni de l’image d’un passa glourious – mai se retrouba pèr s’avisa mai-que-mai de l’acioun que menan e de la liberta que sèmpre reclaman.
Èstre urous dins soun païs, ié trouva si marco, saupre soun biais de viéure e agué l’envejo de lou parteja e parti à la descuberto dóu mounde : vaqui ço qu’es, la liberta.
Uno liberta que tóutis aquéli que s’interesson i lengo counèisson e n’avalouron la bèuta e la richesso.
Liberta. Liberta, proumié mot de nosto deviso naciounalo. Liberté, liberté chérie dis noste inne naciounau. Sian-ti bèn libre, dins lou païs di dre de l’Ome ? Sian-ti bèn libre de chausi uno lengo à parla ? Sian-ti bèn libre de viéure uno culturo sènso vergougno ? Car en bèn acò, la liberta : lou poudé d’agi sènso coustrencho. Mai pèr èstre libre, fau-ti pas lou vougué au founs dóu cor ? Pèr ié rèndre tout soun èime, tout soun alen, tóuti si forço ? Nous fau pausa la questioun : sian-ti tóuti engaja entimamen ? Sian-ti tóuti bèn counsciènt de ço que sian ?
Diguerias Mèstre, en Albi en 1882 dins L’estacamen au terraire « […] dóu moumen que voulèn èstre d’ome, que voulèn resta libre e que voulèn trachi toujour-que-mai e prene d’alo, devèn-ti pas nous garanti contro l’abus de l’unita […] que vai jusqu’au tufe desseca li sourgènt de nosto independènci ? ». Davans lou toumbèu sacra, lou dise sènso pòu : en aquéli que fan lou proucès au Felibrige de reclama uno independènci geougrafico o amenistrativo : s’enganon, e lou sabon. Lou Felibrige reclamo la liberta, de parla la lengo que vòu, de viéure la culturo que vòu e de ié douna sa plaço dins la culturo naciounalo. Lou Felibrige reclamo de respeta sis estajan dins si vilo e si vilage. Pas mai, pas mens.
Mai èstre libre, es chausi. E pèr chausi fau sabé.
Pèr la Santo-Estello de 1877 en Avignoun, Frederi Mistral diguè encaro : « […] Rejouïssen-nous dounc, o fraire e sorre en Felibrige, d’avé pèr obro e pèr pres-fa lou sauvamen d’un idiomo, e demembren jamai, tant Majourau que Mantenèire, que lou premié devé d’un veritable felibre es d’ensigna au pople lou respèt de sa lengo […] ».
Apoundrai vuei emé soulennita lou respèt de sa lengo e la valour de sa culturo, que la lengo clantis, mai la culturo viéu. Pèr carriero, dins si fèsto, dins si coustume, dins sa cousino, dins sa musico, dins sa pinturo, dins sis assouciacioun, dins sis usage… Cadun se dèu n’enmantela e li faire siéuno pèr viéure au presènt e au futur sènso se pausa de questioun.
Ansin, ensigna, trasmetre, assabenta – aquéli mèstre mot – dèvon sèmpre mena nòstis acioun. Lou Felibrige es fièr d’èstre un partenàri atiéu de l’Educacioun naciounalo. Dins l’acadèmi de-z-Ais-Marsiho en particulié, au coustat dóu reitour Bernat Beignier e de l’ispeitriço academico, Celino Marteau-Imbert edito un libre pèr li licean qu’aprenon lou prouvençau ; editara de ficho de voucabulàri pèr lis enfant de meiralo e de primàri e fara espeli uno BD counsacrado à Frederi Mistral.
Au mes de mai venènt, après la Santo-Estello que se tendra à Scèus, vous festejaren, Mèstre, sus la sceno dóu Tiatre anti d’Arle emé 600 escoulan, de primàri fin-qu’à la terminalo, dins un grand espetacle musicau e tiatrau. Sara lou 24 de mai. I’avié-ti uno mai bello endevenènço pèr celebra li 170 an dóu Felibrige ? Voulèn-ti pas leissa à nosto jouinesso un païs libre ?
Aquelo questioun d’identita regiounalo es dins tóuti li bouco. Modo pèr lis un, pèr d’àutri, n’en rèsto pas mens que lou Felibrige es un simbole, un eisèmple dins la recerco de liberta. N’en vole pèr provo li demando de labelisacioun Ciéuta mistralenco qu’arribon semano à cha semano. Diguen-lou : lou Felibrige encarno, Midamo, Messiés, un espèr de liberta. Un espèr de verita. Un espèr de sincerita. Qunto noblo messioun ! Mai qunto escoumesso di grando dins un mounde mounte res sèmblo ana contro aquelo idèio de liberta, mai es jamai tant eisa…
E pamens, la liberta de coumprendre soun païs permet sèmpre de durbi si porto. De descurbi lou mounde emé groumandige. De s’endrudi di culturo d’aiours ; e bessai, de lis ispira. Frederi Mistral fuguè un eisèmple dins nòsti mantenènço, en Franço, en Éuropo e bèn mai ! Au Chili, es la pouëtesso Gabriela Mistral qui i’empruntè jusqu’à soun noum ! Salude alor calourentamen la presènci d’uno delegacioun dóu Chili, menado pèr nosto sòci nouvelàri Teresa Bonan e pèr Jòri Bonan, presidènt de l’Alianço franceso, regioun de Coquimbo.
Alor que dins quàuqui semano se durbira uno annado « Frederi Mistral » à l’aflat de la regioun ounte lou Felibrige tendra touto sa plaço, emé counvicioun e emé fisanço, vous counvide tóuti de vous endraia vers la liberta.
« La liberta se douno pas, la liberta se pren ».
(Aiòli 153, 1895, dicho pèr L’unioun di sendicat agricolo de Prouvènço)
Paulin Reynard,
Capoulié dóu Felibrige
