Cènt-cinquantenàri de l’envanc !

1862 – 2012

Cènt-cinquantenàri de l’envanc (1) !

-Anniversàri marcant en aquest an 2012. Vuech an après Font-Segugno, fai cènt-cinquanto an, d’ate pregound escampavon, sajelèron la voucacioun dóu Felibrige. En 1862 dounc, lou Felibrige tenié pèr lou proumié cop, en vilo d’Ate, de gràndi fèsto felibrenco que baièron l’envanc dóu nouvelun. À-n-aquelo óucasioun Frederi Mistral prounounciè de-segur soun proumié grand discours d’ardour proupagarello, li Jo Flourau faguèron mirando e de-bon aquéli fèsto fuguèron lou proumié vertadié rescontre dóu Felibrige emé lou pople. Pièi, es en 1862 que lou Felibrige se douno soun proumié reglamen, premiço de ço que saran quatorge an plus tard lis estatut de 1876 qu’an fisa pèr sèmpre la lèi felibrenco. Lou Felibrige d’à cha pau s’es estrutura, s’es istala, s’es impausa coume la proumiero ourganisacioun de revendicacioun lenguistico e regiounalisto. N’en fau pas mai pèr coumprendre la jalousié qu’entrino. E, pèr reacioun espoumpido de croio, toustèms lou Felibrige sara ataca. De l’ajeitiéu felibrique (1862) au verbe tutupampaneja (2011), de mot soun enventa pèr ié faire tort, pèr l’insulta. Mai an bèu councha lou mounumen escrèt, lou tèmple es basti, …e l’òli fin revèn toujour au dessus !
-L’an 1862 fuguè dounc d’uno impourtanço majo dins l’istòri de noste mouvemen, fissè l’empento e la filousoufìo, espremiguè la voulounta e la determinacioun, definiguè la règo e li toco. En 1862 l’engajamen e l’enavans primon davans tout. L’engajamen e l’enavans de 1862, dèvon vuei encaro, dins la pïouso remembranço, nous empura tenesoun, voio, amiro. À l’idèio de ço que visquèron nòsti predecessour afourtissèn nous que mai !
-Despièi 1862 dounc, de deseno d’an en deseno d’an, l’evoulucioun dóu Felibrige jamai calè. Ai pas aqui de retraire tóuti li lucho e li vitòri, mai vole, cènt-cinquanto an après l’espelido dóu proumié reglamen felibren, à l’aubo de 2012, clama la fidelita à l’Idèio, afierma l’oustinacioun à faire gagna lou Verai, atesta dis acioun qu’an jamai fali. Lou Felibrige atuau, à l’image de soun istòri es naturalamen en plen mudamen, evouluno, travaio, se mouderniso e agis. N’avèn encaro agu la provo à la Santo-Estello di Santo emé li bilans presenta e l’adóucioun de la reourganisacioun di Mantenènço. L’obro dóu Counsèu de l’Escrit Mistralen peréu counfiermo l’inmancablo marcho en avans dóu Felibrige.
-Dins aquelo endrechiero li felibre, fièr e counquistaire, fan que mai valé l’eiritage, tenon targo pèr reüssi encaro quàuquis avançado.
Sèmpre souto l’empencho de 1862 fara flòri la vido felibrenco en 2012.

Jaque MOUTTET

Capoulié dóu Felibrige

-(1) Pourtissoun de la Revisto Lou Felibrige N° 268, janvié-febrié 2012.

Cet article a été publié par

Agenda

< 2020 >
Octobre
LMMJVSD
   1234
567891011
12131415161718
19202122232425
262728293031 
© Le Felibrige Tous Droits réservés | Réalisation Dream Media® 2016 - Mentions légales et crédits