Mantenènço de Gascougno-Naut Lengadò
Istalacioun e eleicioun dóu Burèu
S’es tengudo, lou dissate 3 de desèmbre 2011 à Toulouso, l’assemblado generalo de la Mantenènço de Gascougno-Naut Lengadò souto la presidènci dóu Capoulié Jaque Mouttet, assista dóu Clavaire dóu Felibrige, lou Majourau Gui Revest. Figuravo à l’ordre dóu jour l’istalacioun de la nouvello mantenènço, l’eleicioun dóu sendi e di souto-sendi e lis amiro d’aveni.
-Pèr l’óucasioun de dela li felibre (que fuguèron counvouca), d’ami e de mounde que prènon sa part dins l’aparamen e la trasmessioun de la lengo d’o, o que fuguèron dins lou tèms felibre, èron tambèn counvida. Ansin es un trentenau de persouno qu’èron presènto, demié èli la Majouralo Pauleto Baylac-Serret e li Majourau Patric Delmas, Marc Lagaly e Jòrgi Passerat. Mai tambèn ounouravon de sa presènci Segne Guilhem Latrubesse, Counseié regiounau de la Regioun Miejour-Pirenèu, delega is afaire óucitan e Segne Estève Cros, Carga de Messioun.
-Lou Capoulié durbè lou tai de la sesiho en ramentant lou perqué e lis avantage de la moudificacioun di Mantenènço emai lis article dis estatut relatiéu à la coumpausicioun e à l’eleicioun dóu Burèu mantenenciau. A la fin de soun prepaus a anouncia óuficialamen la creacioun de la Mantenènço Gascougno-Naut Lengadò.
-Emé cinquanto dóu cènt di felibre restaca à la mantenènço presènt o representa se passè pièi à l’eleicioun à buletin secrèt dóu Sendi e di Souto-Sendi.
-Lou Majourau Marc Lagaly es elegi à l’unanimeta Sendi de la Mantenènço Gascougno-Naut Lengadò. Li Mantenèiris Evelino Auban, Bregido Bascaules, li Mantenèire Jean-Jacques Maurette, Bernat Maurel soun elegi Souto-Sendi. Lou Sendi a chausi pèr teni la founcioun de secretairis, la Majouralo Pauleto Baylac-Serret.
-Après aguè fa clanti sis astru calourènt e sis encourajamen lou Capoulié baié la paraulo au Sendi nouvelàri qu’espremissié si gramaci e que tout d’uno evouquè l’ourganisacioun, li mejan, l’acioun de mena, e li proujèt divers de la nouvello mantenènço.
-En fin de sesiho mai que d’un demandèron sa reintegracioun au Felibrige, d’adesioun nouvello fuguèron enregistrado e tóuti de turta lou got de l’amista.
