Remesso de la Cigalo de l’Ort, o de Lansargue
-à Pau Valière
-Pèiro-Bufiero
-Dissate 16 d’abriéu 2011
Moussu lou Maire,
-Midamo, Messiés lis elegi,
-Midamo, Messiés,
-Car Counfraire, cars Ami,
-Car Pau,
Nous veleici dounc mai en Limousin ounte, lou sabès, nous fai sèmpre gau de se retrouva, que i’a gaire mai d’un mes erian aqui pèr l’acamp de vosto Mantenènço.
-Nous veici tourna-mai à Pèiro-Bufiero, pèr un moumen unique, bèn-astra e freirenau, nous veici acampa pèr faire cachiero au Sendi de la Mantenènço felibrenco de Limousin, Pau Valière, que lou Counsistòri dóu Felibrige a elegi felibre-majourau à la Santo-Estello de Castihounés lou 22 de mai darrié en lioc e plaço dóu regreta Jòrgi Girard.
Ansin i’a d’endevenènço que fan particulieramen gau e aquelo d’aqui n’es uno. Tóuti li paraulo de felicitacioun que venèn d’entèndre lou provon.
-D’efèt, vòsti peirin, lou Rèire-Capoulié Pèire Fabre e li Majourau Roubert Joudoux e Michèu Tintou qu’avès vougu de si man reçaupre vosto cigalo d’or de majourau, ensigne desenant de voste nouvèu titre, vous an, tout escas, forço bèn racounta e cubert de lausenjo, revendrai dounc pas sus vòsti merite e voste pres-fa. Me permetrés, de baia soulamen quàuquis esplico sus l’óurigino d’aquelo cigalo, sus si valènt titulàri e sus lou Felibrige, pièi de vous adrèissa coume se dèu moun counfraternau coumplimen.
-La Cigalo de l’Ort, o de Lansargue que vous an fisado, Car Pau, nòsti counfraire majourau, fuguè aquelo, en 1876, d’Aleissandre Langlade. Es éu, soun primadié, que ié baiè lou noum de l’Ort, o de Lansargue, parié coume la maje part di proumié titulàri, batejè aquelo cigalo d’un noum de liò. Ort es lou noum d’un estang de la coumuno de Lansargue dins Eraut ounte neisseguè (en 1820) e ounte mouriguè (en 1900) Aleissandre Langlade. En 1900 dounc, la Cigalo de l’Ort, o de Lansargue quitara pas lou bas-Lengadò, estènt que sara pourtado proche de quaranto an pèr Prosper Estieu. En 1940 sara espingoulado sus lou pitre d’un rouergas, Jan Ladoux e en 1952 sus lou pitre d’Aguste Domergue e enfin en 1971 s’istalo de-bon en Rouergue sus lou pitre de Jòrgi Girard que la pourtara quasimen quaranto an de tèms.
-Vuei, la Cigalo de l’Ort, o de Lansargue prèn soun envòu de-vers lou pounènt, au païs de Brianço, mounte l’astrado a vougu que se pause aqui en troubant bèu recàti sus lou pitre de l’afable sendi de Limousin, Pau Valière, sucessour dounc dóu tant devot Jòrgi Girard.
-Moun car ami Pau, vous lou dise tout franc, lou Counsistòri se regaudis de vous avé aro demié li siéu.
-Midamo, Messiés que nous fasès l’ounour de vosto presènci, e que bessai vous escapon li resoun, lis us e l’ourganisacioun dóu Felibrige pènse qu’ai de vous n’en dire un pau mai sus nosto vièio e noblo soucieta. Sènso tira de long, vaqui à la lèsto ço que poudèn resumi.
En foundant lou Felibrige en 1854 li Primadié se dison de restaura, d’apara e d’espandi la lengo e la literaturo prouvençalo, mai proun lèu e naturalamen, la grano semenado greiara sus tóuti li terro d’o.
Long dis an pièi lis estatut dóu Felibrige an evouluna dins sa redacioun mai lou founs sèmpre demoro. Li darrié, vouta en 1997 à Sarlat dison : « Lou Felibrige es establi pèr apara, manteni e enaura la lengo, la culturo, la civilisacioun e l’identita di païs d’O ; pèr afreira e empura tóuti aquéli que se recounèisson dins la Pensado e l’Obro de Frederi Mistral. »
Lou Felibrige se despartis en regioun terrenalo e amenistrativo que s’endevènon i relarg de la lengo d’O : es li Mantenènço. Li Mantenènço soun beilejado pèr un Sendi (un presidènt regiounau) e lou Capoulié qu’es lou presidènt naciounau i’es representa pèr un Assessour. Qu que siegue qu’intro au Felibrige es nouma Felibre-mantenèire, i’a pièi quàsi cènt-vint assouciacioun que ié soun afihado e qu’apelan lis Escolo Felibrenco.
-Tambèn lou Felibrige es representa à l’estrangié pèr li mèmbre assoucia, soun li Sòci dóu Felibrige desparti dins lou mounde entié, de l’Éuropo is Americo en passant pèr lou malurous Japoun.
Enfin au nivèu naciounau, li majourau, coustituïsson lou Counsistòri dóu Felibrige, meno d’acadèmi de cinquanto membre, garanto de la filousoufio e de l’istitucioun felibrenco. Soun elegi à vido, e l’avèn di, soun titulàri d’uno cigalo que se pòu coumpara à-n-un fautuei d’acadèmi, d’aiours segound lis us academi, se tèn uno sesiho souleno, au moumen de la Santo-Estello (lou coungrès dóu Felibrige), li majourau nouvelàri prounóuncion lou laus de soun predecessour.
-Aurés dounc, car ami, la cargo, davans l’assemblado santestelenco, de lauseja l’auto memòri dóu tant regreta Jòrgi Girard.
-Car Pau Valière, vous veici dounc lou sieisen titulàri de la Cigalo de l’Ort, o de Lansargue, vous veici un di cinquanto qu’an la cargo de garda la tradicioun felibrenco e de manteni noste mouvemen dins la draio qu’enreguèron li Primadié en favourisant e en ourganisant au pu aut nivèu tóuti lis acioun que pareiran indispensablo à l’aparamen dóu patrimòni, au respèt de l’identita au mantenemen em’à l’enançamen de la lengo e de la culturo di païs d’O.
-Vous veici dins aquelo noblo e enauranto founcioun de Majourau. Voste role aro, coume tóuti vòsti counfraire, es d’acampa lou mounde e de l’adraia de-vers l’Ideau.
Aurés aro, mai qu’avans encaro, i coustat de vòsti counfraire, d’èstre un membre agissènt, e de prendre la part de travai que nous revèn tóuti, dins l’amiro de mies faire viéure lou Felibrige e d’empura soun enavans, de faire clanti sa paraulo. Mai sabe qu’avès pas espera d’èstre majourau pèr coumpli lou devé. Voste afougamen, vosto fidelita is idèio mistralenco e vosto fervourouso voulounta de faire gagna lou Bèu e lou Verai aluminon l’espèr que metèn en vosto persouno.
-Sabe que prendrés uno part ativo dins la countinuëta de l’obro, à l’aussado de la fiero mount-joio felibrenco e à l’enantimen de noste mouvemen dins soun soulide e soun atualita.
-D’atualita, justamen vous n’en dirai un mot. 157 an après sa foundacioun, lou Felibrige perseguis soun pres-fa dins la fermo rego de si davancié.
– Lou Felibrige, en coungrès de Castihounés, l’an passa, ramentè un cop de mai qu’aparo la lengo d’O dins la diversita de si parla.
– Lou Felibrige publico uno revisto tóuti li dous mes, a crea i’a quatre an lou Counsèu de l’Escri Mistralen qu’a pèr toco de metre à jour lou Tresor dóu Felibrige, a crea Felibrige-edicioun qu’a douna lou Diciounàri dis autour de lengo d’O dóu Majourau Fourié, li laus di majourau defunta, lis ate dóu coulòqui « Mireille un argument pour le Felibrige, une œuvre universelle », lou raconte dóu viage di felibre à Barcelouno en 2008.
– Lou Felibrige a travaia ferme à-n-uno reourganisacioun de si mantenènço, aquelo reformo sara presentado au vote au Counsèu Generau dóu Felibrige à la Santo-Estello venènto.
– Lou Felibrige pièi a adu sa countribucioun à la preparacioun di proujèt de lèi sus li lengo regiounalo. À-n-aquéu sujèt avèn rescountra à Paris, i’a gaire mai de quinge jour li deputa Le Fur e Jung e, sènso intra dins lou debat pouliti, lou Felibrige a fa entèndre sa voues toucant la reformo di couleitiveta territourialo e la recentralisacioun que se tramo, en ramentant que lou Felibrige a jamai decessa de prouclama la necessita d’uno vertadiero decentralisacioun e en ramentant que lou Felibrige enventè lou regiounalisme e que si meiours oubrié fuguèron Frederi Mistral, Leoun de Berluc-Perussis, Jan Carle-Brun o Jóusè d’Arbaud.
Vaqui pèr faire lèu…
Midamo, Messiés, lou Felibrige decan di mouvemen d’aparamen e d’espandido de la lengo d’O, toustèms a sachu faire valé li foundamento d’uno soucieta armouniouso, respetouso dóu racinun terradouren e di pople mespresa, di lengo e di culturo.
-Vuei encaro, dins aquelo fidèlo endrechiero, lou Felibrige tèn targo pèr faire counèisse e recounèisse de tóuti, li lengo e culturo minourisado, l’istòri nostro, li valour simplo de nòsti terradou fàci à-n-un mounde destimbourla e à l’abestimen generau que tóuti li jour nous aclapon un pau mai.
-Vaqui i’a de pan sus la cledo. Sabe, car Pau, que sias un bon aposto de la Causo e que sarés sèmpre lèst pèr adurre vosto pèiro au clapié.
Vous, l’ami de tóuti, sauprés faire canta d’uno memo voues lis enavans di fort dins d’acourdanço de coumprenesoun, de toulerènci e d’esperanço.
Apounde encaro un cop i voues unanimo de tóuti vòstis ami, car Pau, car Majourau, mis encourajamen pèr toujour mies countunia, mi felicitacioun li mai sincèro e touto moun amista.
