Remesso de la Cigalo de l’Agout, o de Buzet

Remesso de la Cigalo de l’Agout, o de Buzet
-à l’abat Miquèu Desplanches
-Seloun de Crau
-Dissate 9 d’óutobre 2010

Madamo la Cabiscolo,
-Moussu lou Souto-Presidènt dóu Counsèu Generau,
-Messiés li Deputa,
-Midamo e Messiés li Conse
-Mounsegnour,
-Midamo, Messiés,
-Car Counfraire, cars Ami,
-Car Miquèu,

Nous veleici en d’aquelo agradivo vilo de Seloun ounte nous fai sèmpre gau de se retrouva. Moussu lou Proumié-Conse avès toujour aqui belamen soustengu l’idèio mistralenco, n’avès d’aiours bellamen baia la demoustranço l’an passa en aculissènt la Santo-Estello. Tambèn, la valènto escolo felibrenco de l’Eissame qu’avés souto voste gouvèr tèn aqui l’empento e saup mena de-bon lou travai pèr valourisa l’èime prouvençau.
-A l’Eissame, e mai que mai à vous, Moussu lou Proumié-Conse anaran, tout d’uno, nòsti bèu gramaci.
-Mai nous veici vuei à Seloun, aqui à l’oustau Sant-Francés, pèr un moumen unique, bèn-astra e freirenau, nous veici acampa pèr faire cachiero au curat-decan di parròqui de Seloun e Gran, Miquèu Desplanches, que lou Counsistòri dóu Felibrige a elegi felibre-majourau à la Santo-Estello de Castihounés lou 22 de mai darrié en lioc e plaço dóu regreta Pèire Causse, sant ome de glèiso afouga pèr la lengo, coume éu. Ansin i’a d’endevenènço que fan particulieramen gau e aquelo d’aqui n’es uno. Tóuti li paraulo de felicitacioun que venèn d’entèndre lou provon.
-Vai dounc se presenta lou moumen soulenne de vous espingoula la cigalo d’or de majourau, ensigne simbouli de voste nouvèu titre, mai me permetrés, d’en proumié, de baia quàuquis esplico sus l’óurigino d’aquelo cigalo, sa longo istòri e si valènt titulàri qu’an ounoura lou Felibrige, pièi de vous adrèissa óuficialamen coume se dèu moun counfraternau coumplimen.

La Cigalo de Buzet, o de l’Agout que vous an fisado, Car Miquèu, nòsti counfraire majourau, fuguè aquelo, en 1876, de Pau Barbe. Es éu, soun primadié, que ié baiè lou noum de Buzet, o de l’Agout, parié coume la maje part di proumié titulàri, batejè aquelo cigalo d’un noum de liò. D’efèt, Pau Barbe nascu en 1831 à Toulouso èro óuriginàri la viloto de Buzet-sus-Tarn à quàuquis estirado de la ribiero Agout.
-Firmin Carles de Carbonnières, tambèn ouriginàri dóu Tarn, proumié Sendi de la Mantenènço d’Aquitàni, sucediguè à Pau Barbe en 1884.
La Cigalo de Buzet, o de l’Agout sara pièi pourtado en Lauraguès pèr lou baroun Marìo-Louis Desazars de Montgailhard, èro conse d’Avignounet coume d’aiours soun predecessour èro conse de Lavaur (La viloto de Lavaur, es bagnado pèr l’Agout).
-La Cigalo quitara toujour pas lou relarg Toulousen quouro, 24 an après, s’anara pausa sus lou pitre dóu canounge Jóusè Salvat que la gardara, éu, 45 an, à la sousto de la Glèiso e n’an fara uno clericalo. Uno counsecracioun que counfiermaran si sucessour.
-D’efèt, en 1973 la Cigalo de Buzet, o de l’Agout, leissant lou païs de coucagno, tiro d’alo fin qu’au païs di pesco-luno pèr s’espingoula sus lou pitre de Pèire Causse, prèire de la messioun, nascu à Lunèu, mai que l’astrado a fa mouri à Toulouso, lou païs de sa cigalo, mounte neisseguè soun proumié titulàri.

À l’evoucacioun de Pèire Causse e de soun eleicioun, seguramen, pèr mant un d’entre nautre li souveni remounton, quant sian encaro eici de se souveni de la remesso de sa cigalo sus lou cros dóu marqués, coume l’avié vougu, lou 21 d’óutobre 1973 emé lis Arnaud, lis Aubanèu, li Jouveau, li Teissier, li Théron e bèn d’autre. E quant sian d’entèndre encaro la voues dóu Paire Causse larga à l’acabado de sa dicho : « Moun dernié gramaci l’ai garda pèr la bono bouco, pèr la Nacioun Gardiano qu’espeliguè eici sus aquelo terro de Camargo, dins lou cor arderous d’aquéu chivalié de la Countesso : Folco de Baroncelli, lou Marqués que fagué brouda sus lou pavaioun de la Nacioun Gardiano, li dous noum istouri e prestigious de Toulouso e d’Avignoun en remembranço di grands evenimen de nosto istòri miejournalo.
Que la Cigalo de l’Agout o de Buzet que fuguè pourtado e enaurado 45 an de tèms pèr lou valerous Majourau Salvat me siegue remesso davans aqueste toumbèu es de segur un signe e un signe que s’endevèn bèn emé lou biais veisiounàri dóu maje dóu Simbèu qu’a vougu dourmi eici, entre mar, Durènço e Rose soun darrié som.
Que voulié lou foundadou de la Nacioun Gardiano, senoun recampa li gènt di prouvinço miejournalo, dempièi Durènço e Rose enjusqu’i ribeirès de Garouno, dempièi Avignoun, Avignoun nosto capitalo, Avignoun que canto, Avignoun que ris enjusqu’à Toulouso e Bourdèu. Avignoun la deliciouso, vers Toulouso viro-te, disié lou Marqués. … Que di dos man dóu Rose e jusqu’en Garouno, lou pople dóu Miejour posque parla sa lengo en se dounant la man. »
-Aquéli paraulo dóu Majourau Causse s’ameritavon d’èstre rapelado, e demandon mai d’èstre meditado.

E vaqui vuei, la Cigalo de l’Agout o de Buzet perseguissènt soun vòu vers lou levant, a passa Rose pèr se pausa en païs selounen ounte poudié pas trouva meiour recatadou sus lou pitre dóu flame curat de Sant-Laurèns, l’abat Miquèu Desplanches.
-Moun car ami Miquèu, lou Counsistòri se regaudis de vous avé aro demié li siéu, sufis pèr se n’en counvincre de regarda la resulto de l’eleicioun que farié bada mai d’un. Lou Counsistòri emai li felibre en generau vèson en vous lou digne sucessour di grand predicaire prouvençau, vous vèson meritous dins la bello lignado, estènt que sias sestian, de Mounsegne de Mazenod, dóu Canounge Hémery o de Mounsegnour Plano que salude eici respetousamen.
-Pièi, qunto meiouro sucessioun poudian douna i Majourau Salvat e Causse, senoun un prèire de vosto qualita que dins sa draio proufèsso l’aparamen de la lengo, di valour umano, de la terro nostro e de l’idèio mistralenco.
-Sian devènt à vòsti peirin d’agué presenta vosto candidaturo i sufrage counsistouriau : la Majouralo Glaudeto Occelli-Sadaillan, lou Majourau Lucian Durand e lou Majourrau Jòrgi Passerat. Vous an, tout escas, forço bèn racounta, mai pamens me fai plesi de ramenta aqui l’ufanouso messo de la Santo-Estello de z-Ais en 95 ounte souto vosto beilié mai de dous cènt pastouralié avien fa resclanti nòsti cantico coume jamai plus lis avèn ausi. Acò demoro pèr iéu un remèmbre inóublidable. Pièi coume pas, car Abat Desplanches, quicha sus l’amour de la Nacioun Gardiano, de la Camargo e di Santo, sus vosto implicacioun dins lou roumavage di Sànti-Marìo de la Mar o de la Nacioun Gardiano à Lourdo en plen sus li piado de voste predecessour, lou Paire Causse. Rejougnès e perseguissès ansin pan pèr pan la messioun qu’èro la siéuno, tant dins la Glèiso que dins lou Felibrige, acò, de-bon, pertoco, poudèn que lausa la Prouvidènci e i’espremi gramaci e recouneissènço.

Midamo, Messiés que nous fasès l’ounour de vosto presènci, e que bessai vous escapon li resoun, lis us e l’ourganisacioun dóu Felibrige pènse qu’ai de vous n’en dire un pau mai sus nosto vièio e noblo soucietat. Sènso tira de long, vaqui à la lèsto ço que poudèn resumi.

En foundant lou Felibrige en 1854 li Primadié se dison de restaura, d’apara e d’espandi la lengo e la literaturo prouvençalo e de ié baia uno ourtougràfi mouderno.
-Segur long dis an lis estatut dóu Felibrige an evouluna dins sa redacioun mai lou founs demoro. Li darrié, vouta en 1997 à Sarlat dison : « Lou Felibrige es establi pèr apara, manteni e enaura la lengo, la culturo, la civilisacioun e l’identita di païs d’O ; pèr afreira e empura tóuti aquéli que se recounèisson dins la Pensado e l’Obro de Frederi Mistral. »
-Lou Felibrige se despartis en sèt regioun terrenalo e amenistrativo de Niço à Bourdèu e fin qu’à Limoge que s’endevènon i relarg de la lengo d’O : es li Mantenènço. Li Mantenènço soun beilejado pèr un Sendi (un presidènt regiounau). Qu que siegue qu’intro au Felibrige es nouma Felibre-mantenèire, i’a pièi quasi cènt-vint assouciacioun que ié soun afihado e qu’apelan lis Escolo Felibrenco.
-Tambèn lou Felibrige es representa à l’estrangié pèr li mèmbre assoucia, soun li Sòci dóu Felibrige desparti dins lou mounde entié, de l’Europo is Americo en passant pèr lou Japoun.
-Enfin au nivèu naciounau, li majourau, counstituïsson lou Counsistòri dóu Felibrige, meno d’acadèmi de cinquanto membre, garanto de la filousoufio e de l’istitucioun felibrenco. Soun elegi à vido, e l’avèn di, soun titulàri d’uno cigalo que se pòu coumpara à-n-un fautuei d’acadèmi, d’aiours segound lis us academi, se tèn d’uno sesiho souleno, au moumen de la Santo-Estello (lou coungrès dóu Felibrige), li majourau nouvelàri prounouncìon lou laus de soun predecessour.
Aurés dounc, car ami, la cargo e la joio, davans l’assemblado santestelenco, de lauseja l’auto memòri dóu tant regreta Pèire Causse.
Car Miquèu Desplanches, vous veici dounc lou sieisen titulàri de la Cigalo l’Agout o de Buzet, vous veici un di cinquanto qu’an la cargo de garda la tradicioun felibrenco e de manteni noste mouvemen dins la draio qu’enreguèron li Primadié en favourisant e en ourganisant au pu aut nivèu tóuti lis acioun que pareiran indispensablo à l’aparamen dóu patrimòni, au respèt de l’identita au mantenemen em’à l’enançamen de la lengo e de la culturo di païs d’O.
-Vous veici dins aquelo noblo e enauranto founcioun de Majourau. Voste role aro, coume tóuti vòsti counfraire, es d’acampa lou mounde e de l’adraia de-vers l’Ideau.
-Avèn tóuti d’èstre de mèmbre agissènt, e de prendre la part de travai que nous revèn dins l’amiro de mies faire viéure lou Felibrige e d’empura soun enavans, de faire clanti sa paraulo. Mai sabe qu’avès pas espera d’èstre majourau pèr coumpli lou devé, pèr predica l’enavans e la fraternita. Voste afougamen, vosto fidelita is idèio mistralenco e vosto fervourouso voulounta de faire gagna lou Bèu e lou Verai aluminon l’espèr que metèn en vosto persouno e apoundrai qu’es uno countentesso de vèire veni un nouvèu e jouine majourau de vosto qualita, de lou vèire empli d’uno vertadiero fe (e pèr vous la fe es pas un mot vuege).
-Sabe que prendrés uno part ativo dins la countinuëta de l’obro, à l’aussado de la fiero mount-joio felibrenco e à l’enantimen de noste mouvemen dins soun soulide e soun atualita.
-D’atualita, justamen vous n’en dirai un mot. 156 an après sa foundacioun, lou Felibrige perseguis soun pres-fa dins la fermo rego de si davancié.
– Lou Felibrige, en coungrès de Castihounés, ramentè qu’aparo la lengo d’O dins la diversita de si parla.
– Lou Felibrige publico uno revisto tóuti li dous mes, a crea i’a quatre an lou Counsèu de l’Escri Mistralen qu’a pèr toco de metre à jour lou Tresor dóu Felibrige, a crea Felibrige-edicioun qu’a douna lou Diciounàri dis autour de lengo d’O dóu Majourau Fourié, li laus di majourau defunta, lis ate dóu coulòqui « Mireille un argument pour le Felibrige, une œuvre universelle », lou raconte dóu viage di felibre à Barcelouno en 2008.
– Lou Felibrige travaio à-n-uno reourganisacioun de si mantenènço, à la publicacioun d’uno metodo de prouvençau sus DVD e ourganiso si Grand Jo flourau setenàri en 2011.
– Lou Felibrige pièi a adu sa countribucioun à la preparacioun dóu proujèt de lèi sus li lengo regiounalo e, sènso intra dins lou debat pouliti, fai entèndre sa voues toucant la reformo di couleitiveta territourialo e la recentralisacioun que se tramo, en ramentant que lou Felibrige a jamai decessa de prouclama la necessita d’uno vertadiero decentralisacioun e en ramentant que lou Felibrige enventè lou regiounalisme e que si meiours oubrié fuguèron Frederi Mistral, Leoun de Berluc-Perussis, Jan Carle-Brun o Jóusè d’Arbaud.

Midamo, Messiés, lou Felibrige decan di mouvemen d’aparamen e d’espandido de la lengo d’O, toustèms a sachu faire valé li foundamento d’uno soucietat armouniouso, respetouso dóu racinun terradouren e di pople mespresa, di lengo e di culturo.
-Vuei encaro, dins aquelo fidèlo endrechiero, lou Felibrige tèn targo pèr faire counèisse e recounèisse de tóuti, li lengo e culturo minourisado, l’istòri nostro, li valour simplo de nòsti terradou fàci à-n-un mounde destimbourla e à l’abestimen generau que tóuti li jour nous aclapon un pau mai.
-Vaqui i’a de pan sus la cledo. Sabe, car Miquèu, que sias un bon aposto de la Causo e que sarés sèmpre lèst pèr adurre vosto pèiro au clapié.
Vous, lou musician sauprés pièi mena l’ourgueno e faire canta d’uno memo voues lis enavans di fort dins d’acourdanço de coumprenesoun, de toulerènci e d’esperanço.
-Enfin farai miéuno li paraulo prounounciado en 1973 pèr lou Majourau Ravous Arnaud à l’entencioun dóu Paire Causse, s’encapon vuei perfetamen à soun sucessour, lou Paire Desplanches. Ai dounc ramplaça li noum de Salvat e de Causse pèr li noum de Causse e de Desplanches : « Lou Majourau Causse n’aurié pas vougu un autre sucessour : un ome de fe crestiano, de fe felibrenco, plen de voio e de simplicita… Sian urous d’èstre vuei, reüni ensèn, pèr agué lou plesi escrèt de ié remetre la cigalo d’or … Sabèn que lou Paire Desplanches caminara dins l’esclargido e que seguira sèmpre, li piado de si predecessour, dins la causo de l’esperit e dins li causo dóu cor. »

E aro, après aquelo charradisso, apoundudo i voues de vòstis ami, me fai gau de vous pourgi, car Majourau, Car Miquèu, mis astru e mis encourajamen e de vous remetre après que l’agon tengudo Pau Barbe, Firmin Carles de Carbonnières, Marìo-Louis Desazars de Montgailhard, Jóusè Salvat e Pèire Causse, la Cigalo de Buzet, o de l’Agout.

Jaque MOUTTET
-Capoulié dóu Felibrige

Cet article a été publié par

Agenda

< 2022 >
Octobre
LMMJVSD
     1
  • Librejado

    10:00 -18:00
    01-10-2022

    Librejado Trets

    Escrivan prouvençau

2
  • ÓUMAGE AU MAJOURAU JAN FAY

    09:00 -17:00
    02-10-2022

    Dimanche 2 d’octobre 2022 la Maintenance d’Auvergne du Félibrige organise une journée culturelle et festive en hommage au Majoral Jean FAY (1914-2012) dans son village de MENET, Cantal.

3456789
1011121314
  • Filadelfe de Gerde

    15:00 -12:00
    14-10-2022-16-10-2022

    Hommage à Filadelfe de Gerde

    Bagnères de Bigorre

15
  • Filadelfe de Gerde

    15:00 -12:00
    15-10-2022-16-10-2022

    Hommage à Filadelfe de Gerde

    Bagnères de Bigorre

16
  • Filadelfe de Gerde

    15:00 -12:00
    16-10-2022-16-10-2022

    Hommage à Filadelfe de Gerde

    Bagnères de Bigorre

17181920212223
24252627282930
31      
© Le Felibrige Tous Droits réservés | Réalisation Dream Media® 2016 - Mentions légales et crédits