Paulin Reynard élu Capoulié du Félibrige

Paulin Reynard

élu Capoulié du Félibrige

Il succède à Jacques Mouttet

Au cours de la séance du Conseil Général du Félibrige réuni à Arles le lundi 6 juin 2022 à l’occasion du congrès de Santo-Estello, le majoral Paulin Reynard a été élu seizième capoulié du Félibrige.

Avant l’élection, le capoulié Jacques Mouttet annonça :

« Car counfraire majourau, car sendi, car delega di Mantenèço, ai de vous faire part qu’ai reçaupu uno soulo candidaturo à la cargo suprèmo, aquelo dóu Baile, lou majourau Paulin Reynard.

Avans que de ié baia la paraulo voudriéu vous decela que sa longo letro me trevirè, talamen es pleno de sèns, de judice, talamen es remirablo e esmouvènto ».

Immédiatement après, le candidat se présenta de la façon suivante :

Coume lou diguère dissate davans lou counsistòri :

Sian aro bèn segur que noste capoulié a pas chanja d’idèio e que vuei, remet emé esmougudo e emé la retengudo que ié couneissènt, sa cargo de capoulié i sufrage.

Pèr èstre franc, siéu coumoula d’emoucioun…. Ansin, segound l’us, vuei, vous assabènte dounc persounalamen que siéu candidat au capouleirat pèr veni sucedi, à moun biais, emé umelita e emé fe, au capoulié, En Jaque Mouttet.

Mai s’imagina sucedi au Capoulié Mouttet es pas rèn. Coume seguramen èro pas rèn de veni sucedi au Capoulié Fabre…

L’un de mi counfraire vau-clusen me diguè d’aiours, emé resoun, que veni sucedi au capoulié Mouttet sarié uno bello escoumesso tant es pertout, tant saup tout, tant s’interèsso à tout, tant s’entrèvo de tout, tant counèis lou mounde emai l’istòri… Es bèn verai !

Segne Capoulié, vous dève dire mi gramaci. Mi gramaci persounau, tant coume nòsti gramaci couleitiéu, unanime, e respetous pèr voste presfa, pèr voste travai. Vous leissan acaba voste capouleirat lou cor gounfle…

Voste gentun, voste devouamen e vosto umelita soun d’eisèmple. Vosto fe tambèn !

Desempièi lou 1é de janvié 2020 que m’avès, Segne Capoulié, nouma baile ; me siéu counsacra à ma messioun emé touto moun amo, emé tóuti mi forço, tout moun envanc.

Ai barrula d’uno mantenènço à l’autro ; d’un acamp à l’autre. Assaje tóuti li jour de respondre dóu biais lou mai utile poussible i questioun ; i remarco ; is interrougacioun di felibre e di noun-felibre que s’interèsson à noste Felibrige o à si valour.

E dins aqueste travai, ço que me pertoco lou mai, soun li rescontre que se fan. Aquéli rescontre que, ma fisto, foro dóu Felibrige sarien jamai esta poussible. Aquéli rescontre qu’en un clignamen d’iue vous van chanja la vido.

E aquéli rescontre, li vole persegui e faire viéure en tóuti.

Lou Felibrige es pas uno escolo de la vido. Es à-n’éu soulet uno vido !

E aro, ié sian. Ié siéu. Que se presenta au capouleirat es uno decisioun entimo, que degun pòu prendre à nosto plaço, coume me l’an rapela lou capoulié e lou rèire-capoulié.

Sarai sincère e umble : segur qu’emé mi 31 an, 5 mes e 25 jour vuei, ai pas la culturo, l’istòri e lou passat felibren que d’ùni aguèron lou jour de soun eleicioun.

 

Mai, car felibre, ai l’estrambord, ai l’envejo, ai la voio de faire moun bèu proun. Nous faudra camina encaro man dins la man, dins la draio que nous avès traçado. Nous faudra segui l’estello capoulierenco, « santo-estellenco » e felibrenco emé fisanço. Nous faudra l’apara. Dins la forço de l’istòri de la Coupo, ai la voulounta founso de travaia coutrìo emé tóuti li bòni voulounta. Que dins nosto fraternita, me sèmblo qu’un Capoulié tout soulet fai rèn. E vous sabe emé iéu. Sabe que pode coumta sus vàutri tóuti. Aurai besoun de tóuti. Chascun lou saup, i’a d’obro ! Mai nòsti cor soun grand.

En Felibrige, segur que parla d’engajamen « dins lou tèms » farié bessai sourrire.

I’ai rintra à 23 an. Lou sabès tóuti, l’Assemblado di jouine èro moun idèio de proujèt pèr servi lou Felibrige, dins tóuti si mantenènço. Ô valènto jouinesso, que tóuti li generacioun cercon de councerni, d’interessa, d’endraia. Urous siéu de vèire aquest an la resulto de l’Assemblado à través la mostro de coustume presentado à la capello Santo-Ano e de vèire li proujèt que fuguèron presenta pèr soun respousable, lou felibre Guihaume Chevalier.

Pourta pèr voste soustèn, farai moun proun. Quouro intrère en Felibrige, vouliéu servi uno Causo. Jamai auriéu pensa, à l’ouro que signave moun buletin emé moun peirin-proufessour, lou majourau Andriéu Gabriel, que servi la Causo me menarié à vous prepausa de n’en prendre la tèsto. Sabe aqui que l’obro m’espèro, sarai tant que poudrai atravali pèr la grandour dóu Felibrige, de soun istòri e de soun aveni.

Enfin, dirai que sarai pas un capoulié soulitàri. Aurai besoun d’un burèu atravali, coumpetènt. S’un cop ère elegi, vous fariéu assaupre tout d’uno li noum di baile e clavaire. Aurai besoun d’àutri man, d’àutri coumpetènço e mancarai pas de nouma d’encarga de messioun. Pode adeja dire, mi gramaci au Capoulié qu’a aceta l’idèio de garda la gestioun coumplèto de la revisto. Quouro sabèn lou travai que reclamo aquel óutis remirable pèr li felibre, que fai lou liame entre tóuti, que sèr d’archiéu felibren e qu’adus, quouro arribo, lou bonur d’agué li novo de la famiho felibrenco : ié dise mi founs gramaci.

Li sendi, lis assessour e li cabiscolo e casbiscòu auran tambèn touto sa plaço de jouga. Pèr travaia ensèn dins nòsti mantenènço ; dins nòstis escolo.

Lou Felibrige a 168 an. 

Tre sa creacioun èro tout-à-n-un cop mouderne e eiritié d’un passat glourious.

Dins l’amista di felibre que l’animon, dins la fraternita de la Causo que nous fau garda, apara, dins l’amour de nosto lengo, nous fau sèmpre faire avans. La fe dins l’an que vèn nous dèu mena cade jour, dèu pourta nòstis espèr. Ai fisanço !

Toujour lou Felibrige a sachu s’asata à soun tèms. Is evoulun de la soucieta.

Lou Felibrige es pas uno vièio assouciacioun de pouèto que s’entaulèjon un cop l’an pèr se douna de cigalo. Es lou simbèu d’uno fe cavihado au trefouns de nosto amo, es la passioun que gisclo de nòsti cor, es, pèr iéu, lou sourgènt de l’amour de nosto terro. Es lou biais de viéure qu’enausso pas simplamen nosto culturo o nosto lengo, mai ço que sian ! E ço que voulèn trasmetre e parteja.

Es ço que trasmetèn e ço que partejan.

Vaqui, car felibre, ço que vous vouliéu dire vuei.

Longo mai pèr noste Felibrige !

L’élection se fit à bulletin secret. Le dépouillement donna au majoral Paulin Reynard une quasi unanimité et ne extraordinaire ovation salua le résultat.

Les premières paroles du capoulié Paulin Reynard :

Gramaci !

Sara moun proumié mot de capoulié elegi. Gramaci !

Gramaci car felibre de me pourta tant fort e emé tant de fe à la tèsto de noste Felibrige. Vosto fisanço m’ounouro, vosto fisanço m’engajo, vosto fisanço me tèn !

Ai lou bate-cor !

Dins l’idèio de trasmessioun, Segne Capoulié, encaro un cop, vous dève dire mi gramaci. Mi gramaci e moun amiracioun, sincèro, pèr voste devouamen tant prefouns, pèr lou doun qu’avès fa de vosto persouno, de vosto vido pèr lou Felibrige. Secretàri amenestratiéu, baile, pièi capoulié dóu Felibrige sège an de tèms, aurés, fin finalo, passa mai de 30 an dins lou gouvèr felibren… Acò forço lou respèt, marco de gràndi coumpetènci e provo de capitado dins l’obro capoulierenco.

S’erian rescountra à la debuto de vosto mandaturo, alor qu’ère jouine membre de l’assouciacioun vau-clusenco Prouvençau Lengo Vivo que reçaupeguè lou prèmi Vouland de la voucacioun prouvençalo. Pièi, de mai o mens luen vo proche, se sian segui. Avèn pres lou tèms de se descurbi. Pamens, toujour, m’avès douna vosto fisanço. E vosto fisanço m’ounouro. E me fau bèn recounèisse que jamai desfautavo. Avès di lou verai : l’ai bèn senti, l’ai bèn coumprés, ai fa de moun miés pèr l’integra : m’avès, desempièi tres an, fourma, endraia, e dirai meme ementela d’uno messioun quàsi capoulierenco pèr me mena à-n-aquelo eleicioun ! Sènso jamai rèn m’escoundre, m’avès counvida de chifra, de prendre de decisioun, de prepausa d’idèio. M’avès leissa travaia, sènso fali, pèr pourta l’ideau, pèr apara nosto causo, dins la pensado e dins la fe dóu Mèstre.

Emé vosto ajudo, emé vòsti counsèu, menarai emé counvicioun lou batèu felibren, meme se, lou sabès proun bèn, coume lou Rose à dous pas d’aqui, lou flume de la vido felibrenco es pas toujour tranquile… Segne Capoulié, gramaci pèr la transicioun qu’avès pourgido. Pas tant pèr iéu, mai pèr lou Felibrige, pèr l’istitucioun.

Sarés deman rèire-capoulié dóu Felibrige. Mai sarés subretout deman un grand rèire-capoulié que l’istòri n’en gardara la remembranço.

Apounde aqui un mot de gramaci au clavaire Gui Revest que desempièi sege an acoumpagno lou capoulié. Desempièi 2020, ensèn au burèu, avèn oubra, avèn imagina, avèn coumta… Toujour lèst à ajuda, car Gui, avèn fourma cadun emé nosto persounalita uno meno de gardo raprouchado dóu capoulié e avèn mena o assaja de mena, pèr la grandour dóu Felibrige, nòsti proujèt ! Gramaci de m’agué ajuda, de m’agué tendu la man sus la draio felibrenco e de nous ounoura tu tambèn de ta fisanço.

Voudriéu pièi agué tambèn uno pensado pèr nosto gènto rèino Adelino.

Se la rèino Adelino encarno lou gentun, lou sourrire e la fèsto, es tambèn uno font d’ispiracioun e uno auriho atentivo dins l’obro felibrenco. Sabèn lis idèio, li valour e li proujèt que partejan. Gènto Rèino Adelino, siéu fièr de te veni rejougne pèr camina à ti coustat e durbi uno draio i felibre de nòsti mantenènço. Un mot tambèn, que sian dins sa vilo, à la rèino d’Arle, e à si cinq damisello d’ounour. Avèn, cars ami, emé lou 24en reinage d’Arle, sièis felibresso ! S’acò es pas la provo d’un engajamen. D’uno presènço felibrenco renousado emé lou pople arlaten !

Gènto Rèino Adelino, gènto Rèino Camiho, gènti damisello, ère sus lou pountin à Brageira en 2018 e dins lou burèu de moussu lou maire d’Arle en 2021 pèr vòsti presso de founcioun respetivo : grando es ma gau de vous vèire tóuti presènto en aqueste jour !

Càri Counfreiresso, car Counfraire majourau, m’avès fa fisanço un proumié cop en 2019 en m’elegissènt majourau. Tourna-mai, vòsti voues me vènon mena vers uno autro messioun.

Voudriéu dire publicamen en tóuti li que m’an escri, que m’an parla, que m’an souna, que m’an sourri, que m’an quicha la man, que, chascun à soun biais m’a douna d’alen.

Ai uno pensado bèn segur, pèr li que soun pas presènt demié nautre de-matin. Tant coume ai uno pensado pèr li counfraire defunta.

I sendi mantenenciau, à si burèu, dise ma devoucioun. Vous acoumpagnarai dóu miés poussible, tóutis ensèn dins l’unita felibrenco, d’Arle à Campan, d’Auriha à Brageira, de Beziés à Feytiat, sarai à vòsti coustat, emé lis assessour.

Segound l’estatut felibren, ai lou devé de nouma un baile e un clavaire dóu Felibrige pèr m’ajuda dins ma cargo.

Ansin, deman, prendra si founcioun de baile dóu Felibrige, lou felibre majourau titulàri de la cigalo di Mauro, elegi en 2008, lou majourau Pèire Imbert.

Toucant lou clavaire, en plen acord segur emé l’estatut felibren, en plen acord tambèn emé lou sendi de la mantenènço de Prouvènço e emé mis escuso au burèu mantenenciau de ié rauba sa clavairis, deman, prendra si founcioun de clavairis dóu Felibrige la manteneiris Jano di Sarno.

Ensèn, fourmaren lou proumié burèu d’aqueste capouleirat que deman se durbira. Ié dise, au baile e à la clavairis, ma recouneissènço d’agué aceta ma proupousicioun. Avès touto ma fisanço !

Vòsti coumpetènci, car baile e caro clavairis, nous permetran de faire avans e d’esperlounga l’obro coumplido pèr nòsti davancié. Vous gramacìe de vosto fisanço. Vous gramacìe d’agué aceta la cargo que vous ai prepausado !

Mi pensado se viron aro de vers Douminico Pain, qu’emé devouamen e patiènci, que quàuqui cop, n’en fau !, obro à la bono marcho dis afaire felibren. Douminico, sabe que li chanjamen jamai soun eisa après tant d’annado, pamens, ai fisanço e li liame qu’avèn nousa desempièi quàuquis annado nous permetran de tira dre !

Càri felibresso, car felibre, li mot me mancon, mai aurai l’escasènço de vous parla tourna-mai.

Gramaci. Gramaci encaro. Dise souvènt « ai fisanço ». Vuei, m’avès fa fisanço. Mai iéu tambèn, ai fisanço dins li felibresso e felibre, ai fisanço dins vosto capacita de mena nòstis idèio. Ai fisanço dins voste engajamen.

Li capoulié e li felibre passon, mai lou Felibrige fai avans.

Dins la fraternita felibrenco, fasèn ensèn un tros de camin sus la routo de l’ideau de Frederi Mistral !

Longo-mai !

La capoulié Mouttet lui exprima enfin ses plus vives félicitations :

“Car capoulié, emé moun afecioun la plus prefoundo, mi plus sincèri e amistadouso felicitacioun. Quasimen tres an de tèms au toco toco emé iéu, vous ai vist à l’obro e aprecia vòsti flàmi qualita, vous veici aro revesti de la plus auto founcioun, vous veici encarga de teni d’à ment noste Felibrige, de lou mena sus soun astrado avenidouiro, de countunia soun istòri.

Vous counèisse trop pèr saupre qu’avalouras lou pes de l’eiretage, qu’avès counsciènci de ço que vous espèro e que dignamen tendrés la founcioun.

Après lou discours de la coupo vous remetrai l’estello d’or que subran vous temudara en un autre ome, soulet aquéli que l’an pourtado n’en podon temounia. L’estello d’or vous ligo direitamen au Mèstre, vous counferis la preeminènci, vous fai encarna la pousterita, la responsableta e senti lou pes de la cargo, mai tambèn vous adus la forço de coumpli vosto messioun e la lus de l’esperanço.

Moun car capoulié, vous dise tournamai mis astru, fisançous siéu”.

Cet article a été publié par

Agenda

< 2022 >
Septembre
LMMJVSD
   1234
567891011
12131415161718
19202122232425
2627282930  
© Le Felibrige Tous Droits réservés | Réalisation Dream Media® 2016 - Mentions légales et crédits