Santo-Estello 2021 Discours de la Coupo

Mende

Santo-Estello 2021

Discours de la Coupo

Dilun 20 de setèmbre

Gènto Rèino,

Car Felibre,

Après li tressimàci de l’an passa, que malurousamen perduron encaro, à Mende (enfin !), pèr lou segound cop, tenèn la Santo-Estello. Mende, ciéuta d’aquelo terro gabalo bastido à l’entour dóu cros de sant Privat.

À l’oumbro majestouso de la catedralo aubourado pèr lou papo avignounen Urban V marcant despièi lou siècle quatourgen la poutènci dis evesque de Mende que dous cènts an aperavans pèr soun enfluènci, enfuscavon li rèi de Franço, avalouran un pau lou pes di valour que nous afiscon, di valour que carrejan.

Moudelen-nous sus aquelo ufanouso catedralo qu’enauro la forço pouderouso, la glòri e lou prestige, pèr counfourta nosto catedralo d’ideau, valènt-à-dire lou famous mounumen escrèt farga de dóutrino, de valour e d’ilusioun.

Eisaminen primamen aquésti noucioun, aqueste sentimen, aquesto percepcioun que nous fan crèire, que nous fan viéure e que nous fan avança.

La dóutrino mistralenco : pènse, que tout lou tèms dis entoupinamen, se n’en sian embuga sènso mesuro en relegissènt lis obro e li dicho dóu Mèstre.

Lou majourau Alan Costantini, avié, pèr la Santo-Estello dóu centenàri de la mort de Frederi Mistral en 2014, leissa entèndre que bessai lou mot dóutrino avié uno cargo trop forto au regard de l’idèio de dòumo que countèn e que valié miés parla prudentamen de pensado.

Pamens, apoundeguè, « fau bèn chausi : siegue viéure dins lou scepticisme, siegue aceta uno pensado ourganisado à l’entour de quàuqui poun que soun counsidera coume de verita. Ai fa ma chausido vaqui perqué parlarai de dóutrino ». E, de persegui : « Fau pas nimai counfoundre dóutrino e ideoulougìo. Uno ideoulougìo es uno dóutrino qu’a pèr amiro la preso dóu poudé pouliti e la counservacioun d’aquéu poudé se’n-cop capito. Mistral a jamai agu la tentacioun de prendre lou poudé e, de tout biais, n’avié ges de besoun dóumaci sis idèio èron talamen universalo que poudien s’asata à la maje part di formo de gouvèr, lou podon encaro vuei ».

La dóutrino, dounc, es de noucioun que se creson d’èstre veraio, que baion uno óurientacioun de vido, que guidon l’acioun. Es un ate d’ensignamen que pèr nautre respond à la councepcioun de l’ensignamen mistralen. D’aploumb, poudèn dounc parla de dóutrino mistralenco estènt qu’es bèn questioun de l’engèni d’un ome e d’un mouvemen de pensado. Frederi Mistral a proun lausa l’espàci latin, la fraternita di pople, l’esperit de famiho, l’estacamen au terraire, à sis us e à sa lengo pèr que n’en sourgènte la dóutrino que nous avivo. Dins aquelo dóutrino se recato l’enavans di fort, lou parangoun dis ideau, li crido e la sagesso, touto la sustènci lindo e pouderouso qu’à nosto dispousicioun nous tirarien de-vers lis àuti jouïssènço que se trufon dóu toumbèu. Fasen usanço d’aquelo dóutrino. Aceiren-nous à-n-aqueste doun inteleituau que coungreio d’espèr, l’espèr que bouto en relèu li valour pourtado pèr la dóutrino. Aquéli valour s’entieron à bóudre, lou majourau Andriéu Gabriel en 2007 à Caous e lou majourau Nadau Lafon en 2010 à Castihounés n’avien fa lou dedu. Si lausenjo enóuncion claramen li principe que baion la clau pèr viéure sènso deco nosto vido de felibre, esclargissènt uno meno de mouralo, uno etico, l’endrechiero qu’es de mena dins l’amiro maje de sauva, apara e espandi lengo, culturo e civilisacioun di païs d’o. Avisen-nous bèn que luen d’un pensamen de gousto-soulet, s’enarton de noste coumpourtamen un interès generau e uno certano vesioun dóu mounde.

De que n’en reteni, dounc, d’aquéli valour felibrenco ?

Metrai avans tout, l’ounesteta e l’engajamen dins lou respèt dóu dre is idèio, à la diferènci, à la liberta de pensa de cadun tout en acetant uno disciplino, un regard e uno acioun coumunautàri coumpleta pèr lou necite de federa lis enavans à la councepcioun de l’istitucioun decano qu’es lou Felibrige. Perseguirai en disènt que la valour felibrenco significo tambèn : faire targo, buta à la rodo, ana ensèn ; tóuti dins un meme envanc, coutrìo e fisançous. Emai, èstre capable d’espandi lou vertadier image qu’es lou nostre, de mestreja noste destin e de countunia l’obro dóu Mèstre.

Pièi d’aquéli valour, vènon :

– la forço e la counvicioun.

– la counsciènci vivo dóu pople miejournau.

– la noblo amiro de servi, de servi sèmpre !

– la mouralita e la sincerita de nòstis ambicioun.

– la capacita d’ana au contro di noucioun que nous embarron dins de visto d’apaurimen.

– lou desden di critico qu’agarisson noste coumbat.

– lou rebous di crèbo-cor, dis ànci e di tempèri.

– lou sentimen libre d’envisaja l’aveni.

– la determinacioun, lou nouvelun, la prouducioun, la creacioun, l’envencioun, l’ennouvacioun, l’imaginacioun.

– l’eficacita pèr èstre entendu, pèr èstre segui e faire greia de voucacioun.

En quàuqui mot, ço que se presènto coume d’elemen di valour felibrenco. Mai, se podon pas redeima à-n-aquelo letanìo.

Pèr un assajet d’enventàri, fau pas leissa de caire li valour dóu racinun, de la remembranço, de l’eiretage, dóu gai-sabé, emai encaro, tout ço que toco à la prouteicioun e à l’equilibre de la naturo, à la sabènço, à l’inteligènci. Lou majourau Lafon avié larga que « d’àutri valour caro au Felibrige toucavon i raport uman, passavon pèr d’ùni mot coume : councòrdi, armounìo, souciableta, fraternita, soulidarita, acuiènço e counvivèncio, noucioun mestresso dins la civilisacioun di troubadour, valènt-à-dire lou plesi d’èstre ensèn, dins la joio e l’amista sènso massificacioun e que lou Felibrige es uno grando famiho acuiènto ounte l’unioun douno un sentimen de forço e ounte cadun pòu trouva sa plaço. »

La valour que carrejan, dis encaro lou majourau Lafon, es saupre « destria l’ativeta felibrenco propro dis àutris engajamen, precisamen pèr ço que la poulitico es reputado empura lou gavèu e que lou liame souciau dèu pas jamai èstre perdu de visto. Frederi Mistral a pausa que la lengo devié pas èstre estrumentalisado. » E, lou majourau Andriéu Gabriel de precisa : « Fau jamai engaja lou Felibrige dins li marrìdi draio d’un ideau de partit, d’un ideau partisan, d’un ideau qu’es pas ‘quéu que represènto la chausido unamino. » Aquelo valour essencialo de néutralita, d’independènci au regard de qu que siegue, gandis l’èime soubeiran dóu Felibrige.

Li valour dóu Felibrige s’atrobon encaro dins soun estruturo, dins si principe e dins sis usage, mirau d’uno ourganisacioun afermado, forto, ancrado.

Aquéli valour se fan afetivo quouro nous tancon dins la sensibleta, dins lou partage, dins l’esmougudo, dins la coumunioun. Sabèn founcieramen lou sèns qu’aquéli mot quouro aubouran e bevèn à la Coupo santo e versanto. Vivèn alors d’istant que de cop nous soun enveja, aqui caup la quintessènci di valour felibrenco.

Li requìsti noucioun d’elegànci, de gràci, de gentun, de bèuta, de courtesié, clau de la civilisacioun medievalo, soun entracho de l’ideau de nòsti davancié e counforton que mai li valour, de fes que i’a descouneigudo, que representan.

Li valour que recatan, justamen, an pas d’èstre coumpresso pèr tóuti, pèr d’ome que lou mole abestis, pèr de foulo destimbourlado, pèr un mounde trop preissa, pèr un prougrès desvariant, pèr uno unifourmisacioun afligènto. Li valour que recatan s’enausson de dela li barraduro impausado pèr la sourno moudernita, mai tout à-n-un cop podon respondre i questioun de noste tèms e au desvouloupamen sena de l’èstre.

Enfin, evoucarai l’ilusioun.

Lou Mèstre, en 1880 à Roco-Favour, èro revengu sus aquéu councèt en fasènt responso à li que tratavon la Causo felibrenco d’ilusioun : « Eh ! bèn Messiés, recasse la pèiro que nous mandon, aquéu mot desdegnous d’ilusioun ; e d’abord qu’ai l’ounour de pourta la paraulo davans uno assemblado de pouèto, noun troubarés estrange que vous fague l’eloge d’aquelo encantarello, d’aquelo masco jouino e pouderouso que se noumo Ilusioun. »

E, lou Mèstre de faire coumprendre que l’ilusioun pòu faire « trefouli dins li mounto-davalo di nòbli sentimen », que l’ilusioun pòu faire « retrouba sus un pedas de telo li coulour trelusènto de la naturo en vido », que l’ilusioun pòu faire « ploura o rire, que nous aganto pèr li péu, e nous enauro peramount sus li cresten de l’estrambord e dins l’azur di ravacioun ! ».

Frederi Mistral pièi fai la questioun à l’assemblado : « E quand l’ome, à vint an, se lanço bravamen dins la fourèst fougouso de la vido, pèr segui, pèr ajougne, pèr embrassa de sa passioun uno d’aquéli farfantello que danson eilalin davans la visto dóu jouvènt, la bèuta, la liberta, la glòri, lou triounfle, quau es que l’embriago, en despié di precipice que lou separon de la coupo, quau es que lou counforto en despié dis auvàri d’aquéli que toumbèron, e quau es que l’afeciouno, en despié dóu mau-cor d’aquéli qu’an viscu ? Messiés, es l’Ilusioun ». E enfin afiermo que « L’Ilusioun, baume de Diéu, mirau lusènt de la jouinesso, chale e mistèri de l’amour, e brèu de tout bonur sus nosto pauro terro, l’Ilusioun, es mai elo que buto li valènt à l’erouïsme, que coungreio e qu’empuro l’artisto e lou pouèto,[…] » « L’Ilusioun es la voio que fai viéure e reviéure mai que la car e que lou sang ». E, de clama ferme : « […] aquéu miracle d’ilusioun e d’amour que fai reviéure encaro, au bout de sèt cènts an, lou troubaire Rudèl e le coumtesso Melisèndo, aquéu galant miracle de pouësìo e d’ilusiounn lou Felibrige l’acoumplis […] ».

Car Felibre, pas besoun de mai d’esplico pèr s’avisa que l’ilusioun, au sèns felibren, baio uno rego, uno pèndo à nosto counsciènci, adus uno significacioun à nòstis aspiracioun, empuro lou voulé e la determinacioun, baio d’enavans e coumoulo l’esperanço. L’Ilusioun, es pèr nautre, fort de la leiçoun mistralenco, un bèn precious, uno butado de-vers la branco dis aucèu.

Lou triptique : dóutrino, valour e ilusioun que venèn d’espepidouna, formon un tresor mourau e esperitau, un tresor d’arderesso e de referènci, un tresor esteti e armounious. Un tresor que se presènto coume uno armo pacifico, coume un bon èr e coume uno rejouncho de legitime pantaiage qu’enfioco la fe.

Car felibre, à la sousto de la catedralo Nosto-Damo e Sant-Privat, ansin vous vouliéu depinta coume li vese, la dóutrino, li valour e l’ilusioun : pieloun e tresor dóu Felibrige. Es tout vist qu’aquéli noucioun porton counvicioun e courage dins noste coumbat à contre-courrènt, que porton lou discernimen de l’injuste e dóu juste, qu’endraion de-vers lou raciounau prougrès e mai que tout de-vers l’elevacioun umano e universalo de la soucieta.

Dins aquelo counsciènci, car felibre, avèn de teni l’empento, avèn d’espandi nòsti counvicioun, avèn de faire targo. La Coupo que vous presènte, recato lou soulas,

… Un miramen de glòri e de vitòri

Que, dins l’oumbrun di siècle transitòri,

Nous laisso vèire un eslùci dóu Bèu.*

L’auboure, nosto Coupo santo, is àutis aspiracioun felibrenco, i vertuóusi toco ensignado pèr Frederi Mistral.

Beve à la vilo de Mende à sis edile e à soun pople,

Beve à la rèino Adelino, i felibre nouvèu e i majourau nouvelàri,

Beve à l’enavans e à l’esperanço dins li piado de nòsti predecessour,

Beve au Felibrige de vuei e de deman.

Jaque Mouttet

Capoulié dóu Felibrige

 

 

* Lou Parangoun, 8 de setèmbre 1906 (Lis Óulivado)

 

 

 

Cet article a été publié par

© Le Felibrige Tous Droits réservés | Réalisation Dream Media® 2016 - Mentions légales et crédits