SIAN À MAIANO

En pensado, sian à Maiano

Car felibre, cars ami,
Aurian degu, vuei 25 de mars 2020, èstre acampa à Maiano. L’epidemìo que malicejo nous l’enebis. De nòstis oustau, pamens, en aquest jour, sian en coumunion dins la souvenènço dóu Mèstre. Vous prepause, pèr afierma la fe e l’afreiramen que nous unisson, de legi ço qu’aviéu previst d’espremi fàci au cros.
Curiousamen, evoucave aquelo forço que nous buto irresistiblamen davans lou mausoulèu mistralen. Aquelo forço vuei trespasso lis eisigènci qu’avèn de respeta, dóu nostre, mouralamen e espiritalamen sian à Maiano !
J.M.

« 25 de mars : pious moumen de recourdanço que nous acampo imbrandablamen, davans lou cros de Frederi Mistral.
Coume vai qu’un tal atiramen nous meno dous cop l’an en roumavage ? Qunto forço nous embandis fidelamen eici souto l’aubre-de-vido dóu cementèri de Maiano ? Es mau eisa de defini au just l’espountanita de nosto presènci. I’a un quaucarèn que relevo de l’istintiéu e bessai meme de l’incounsciènt. I’a uno meno de poudé au plus prefouns de noste èime qu’atrivo irresistiblamen vers lou Mèstre, un poudé que retrais lou bèn-adus que ié devèn. Èstre fidèu e reculi davans la capoucho blanquinello, permet de sounja à ço que sian, pièi, em’un pau de pensado, à ço que sarian sènso Mistral e enfin à ço que devrian èstre pèr i’èstre mai digne dins nòstis ate de tóuti lis jour.
La forço que nous bandis dous cop l’an à Maiano es pas soulamen un reflèisse de roumiéu, pas soulamen lou biais d’espremi la recouneissènço, mai aquelo forço atrobo tambèn soun esplico, e bessai majamen, dins la necessita de veni pesca l’enavans de nòsti gèst.
Tant que la forço pouderouso de nosto counsciènci guidara lou sentimen de remembranço, jamai la voio e la voulounta nous saran de manco e la memòri dóu mèstre demourara.
Mai, basto pas de demoura recatado dins un cantoun de noste èsse, la memòri dóu mèstre pèr sèmpre, a d’èstre vivo e enaussado. Sèmpre, la memòri a de se tremuda en acioun dins lou drech ana de ço qu’éu voulié. Si resoulucioun, sis amiro, si revendicacioun traspausado e asatado au tèms que sian, menon li foundamento de noste coumbat.
Vuei, nòsti desiranço van vers mai de counsideracioun pèr li ciéutadan que se souciton de soun racinun, pèr tóuti aquéli que volon pas toumba dins la grando oulo di francés calibra ; aquéli qu’an la clar-vesènço de soun apartenènci, que sabon lou verai de sa terro e dis ome que ié vivon, de sis usage e de sa lengo ; aquéli que soun depousitàri d’un passat, d’uno istòri, d’uno memòri, d’uno couneissènço, d’uno literaturo : un sabé universau, uno preciouso richesso, un patrimòri inestimable ignoura pèr un Paris entestardi dins sa voulounta d’escafa dóu païsage naciounau, li tresor culturau e lenguisti de si regioun.
Acò’s un drame que n’en patis l’eiretage ancestrau, que n’en patis la civilisacioun memo.
De-bon, sentèn nòsti desiranço coume d’emperatiéu besoun pèr la subre-vivènço d’un pau de nosto óuriginalita, de noste gàubi, de noste biais d’èstre.
Vuei, voudrian que l’aura de Mistral fague lume sus la mau-parado que nous secuto : sarié que sus la refourmo di licèu o la reglamentacioun qu’amenaço l’ativeta de bouvino.
L’èime terradouren a de gagna sus li coumpourtamen negatiéu, sus lis argumen de nèsci que l’esvalisson, sus aquéli pratico que volon roumpre lou bon sèn ancestrau.
A la lus de ço que fuguè la vido de Mistral, à l’image de sa clarta de visto, de si revendicacioun, de sis aspiracioun, tenèn ferme la barro e la toco de nòsti counvicioun.
I’a pas d’asard se, fidelamen venèn prendre alen, se venèn se clina, se venèn se reviscoula, se venèn rèndre oumenage.
Sara gagna e la Causo counservara sis espèr tant que lou roumavage maianen fara flòri.
Que longo-mai la forço e l’esperit buton lou mounde davans lou cros dóu Mèstre, davans soun venerable mounumen « que d’uno estello à sèt raioun porto l’image » ».

Jaque Mouttet
Capoulié dóu Felibrige

(Dicho escricho avans l’epidemìo de Coronavirus)

Cet article a été publié par

© Le Felibrige Tous Droits réservés | Réalisation Dream Media® 2016 - Mentions légales et crédits