A Maiano lou 3 d’abriéu

-L’anniversàri 102en de la despartido dóu Mèstre fuguè celebra à Maiano, eiceciounalamen, en resoun di fèsto pascalo, lou dimenche 3 d’abriéu 2016. Après la messo en lengo nostro dicho en la glèiso Santo Agato pèr lou majourau Miquèu Desplanches, grand vicàri dóu dioucèsi de z-Ais e d’Arle, es souto la plueio que lou courtege mena pèr un quingenau de cavalié de la Nacioun Gardiano s’es endraia de-vers lou cementèri. Davans la capoucho blanquinello se debanè la ceremounié coume anounciado pèr lou baile Andriéu Gabriel : De Profundis dis pèr lou majourau Michèu Desplanches ; oumenage de la Nacioun Gardiano, pauso de la courouno de saladello e dicho dóu capitàni, lou majourau de Gui Chaptal ; « Moun Toumbèu » larga pèr lou majourau Gabriéu Brun, sendi de la Mantenènço Lengadò-Roussihoun ; dicho d’En Jaque Mouttet, capoulié dóu Felibrige (que veici çai-après) ; oumenage musicau pèr li Cardelin de Maiano.
-Ceremounié acabado, lou maire de Maiano aculissié la noumbrouso assistanço au Cèntre Frederi Mistral. Fau dire que li raisso avien pas retengu lou mounde presènt à cha-cènt. La journado fuguè uno pleno reüssido. S’es acabado pèr la proujeicioun de quàuquis esmouvènt image d’archiéu trouba dins de recantoun dóu Museon Mistral e uno flamo videò charradisso dóu mèstre d’obro Gerard Baudin « Quelques pas de Frédéric Mistral à Marseille ».

-La dicho dóu capoulié :
-« Moun toumbèu » : gaire de pouèmo souto uno formo tant courto e tant simplo evocon tant loungamen lou sentimen dóu tèms que passo, de la glòri que se desfaçouno plan-planet e d’à cha pau s’aprefoundis dins la niue de l’óublit.
-Dins soun vieiounge, Mistral, plen de sèn, se resigno pèr soun païs à-n-un destin ideau e malancòni. Davans soun toumbèu, vèi li gènt s’estouna : « es la toumbo dóu pouèto », pièi, dire : « es un que l’avien fa rèi de Prouvènço », pièi encaro « à bout d’esplicacioun » : « Es lou toumbèu d’un mage, – Car d’uno estello à sèt raioun – Lou mounumen porto l’image. »
-Qunto sublimo leiçoun d’umelita e qunte realisme tambèn pèr uno vido de travai e de sagesso que fuguè aquelo de Frederi Mistral e que se resumo magnificamen dins lou recuei dis « Oulivado ».
-« Lou tèms que se refrejo e la mar que salivo, – Tout me dis que l’ivèr es arriba pèr iéu – E que fau, lèu lèu, acampa mis óulivo – E n’óufri l’òli vierge à l’autar dóu bon Diéu ». Li pouèmo court que lou pouèto coumparo à-n-uno recordo d’óulivo, soun regounfle de sustànci coume dis óulivo raio d’òli qu’entretèn la flamo.
-Lou recuei, es un abréujat de la sapiènci poupulàri. Dis, aquelo sapiènci, d’ounoura nòstis àvi, qu’avèn pas couneigu. Dis au pople, aquelo sapiènci, de pas se leissa endóutrina e, mau-despié de l’erso que sapo, d’adurre nosto clapo pèr mounta lou clapié. Pèr la bouco de l’ouncle Guigue, la sagesso counseio la paciènci e la resignacioun que, en tout, noun fau vèire que lou marrit : « Lou Vènt-Terrau que gisclo – Dins li bartas dis isclo – Vau mai que lou levant – que rènd favanc e van ». « Levant qu’adus la plueio – E l’aigo dins li sueio – Vau mai qu’un Vènt-Terrau – Que debano li brau ». Dis encaro, aquelo sapiènci poupulàri que « Vau mai cinq sòu en pòchi – Pèr faire l’espoumpòchi – que cènt escut presta – Pèr lou Mount-de-Pieta », que « Vau mai un pastre jouve – Qu’un emperaire vièi », e que « Vau mai, à Cadóulivo, – Rire en manjant d’óulivo – Que mau-traire à Paris – En manjant de perdis ». Dins un pouèmo requist, dis tambèn la sapiènci : « Veguen veni ! S’acò’s pas vuei sara deman ». Saup « que la paciènci es lou cepoun de la sapiènci », saup que « duro jamai quand plòu o nèvo ; – Pèr tóuti lou soulèu sa lèvo, – E grum d’eigagno en se fourmant – Autant lusis coume diamant ». La sapiènci, dis encaro, que « Lou païsan, ounte que siegue, – Es lou cepoun de la nacioun ; – Auran bèu faire d’envencioun, – Fau que la terro se boulegue : – Tant que lou mounde noun aura pres fin, faudra que i’ague de pan e de vin ». -Qunte ensignamen de noblo simplesso, de sèn, de clar-vesènço.
-Quouro arribo lou tremount de la vido, lou Mèstre qu’a vist se debana tant de jour e de mounde, noun pòu, tant fort que siegue, s’empacha d’aluca lou passat emé regrèt e tristesso. Un sentimen d’esplandour esvalido semblo ié floureja l’amo, l’obro de reneissènço que s’èro di de mena fuguè-ti pas un pantai ? Sara-ti jamai coumplido ?
-E pamens, vuei mai que jamai, à bèus iue vesènt, tóuti s’avison que l’obro redemtouro, l’obro pouëtico de Frederi Mistral es di mai variado e di mai auto. Si memòri esplicon lou miracle de Mirèio, lou Tresor dóu Felibrige se capito l’apeoun de l’obro, pièi, tóuti de recounèisse que si dicho chabisson l’entre-sièis de sis idèio, d’idèio qu’agantèron lis esperit. Mai acò’s-ti bèn coumprés ? Soun obro, si dicho proufèsson lou prougramo d’un regiounalisme di mai inteligènt, la messo en valour dins tóuti li doumaine, la liberta leissado i regioun de trachi segound la lèi, radurre la vido dóu cèntre is bèu bout dóu bèn.
-Aquéli counsideracioun pescado dins lis escri de moun egrègi davancié Brunoun Durand menon à perpensa sus li veritàbli poussibleta de coumpli lou pres-fa que nous tafuro.
-Se lou doute agantè lou Mèstre, alor que soun obro porto en elo l’armounìo e lou judice, a coungreia d’innoumbràblis enavans, a esclargi la draio dóu reviéure, es au sourgènt de tóuti li courrènt de pensado que vuei se dison d’apara, coume poudrian nautre noun èstre en doute ?
-Emai siguessian li temouin d’un tèmple basti, l’envirouno e lis endevenènço de la soucieta, lou mudige de l’estat, lou mesprès di parlamentàri, l’aplanage de malan espandi pèr tóuti li media, l’óupinioun publico coundiciounado, permèton-ti de persegui, de crèire encaro e de reüssi, permèton-ti un jour de vèire Berro ?
-La questioun s’amerito de-bon d’èstre pausado. Mai,
-« Enterin, se quaucun trouvavo entrepachouso
-Nosto Causo, jouvènço, avans toujour ! Es bèu,
-Coume Maiorco en flour, de lucha courajouso,
-Contro lou picadis de la mar envejouso
-E de jamai subi l’uniforme nivèu ! »

 

Cet article a été publié par

© Le Felibrige Tous Droits réservés | Réalisation Dream Media® 2016 - Mentions légales et crédits