Un nouvèu Sendi
pèr la
Mantenènço de Prouvènço
Fotò G Pascal e J M Courbet
-S’es tengudo, lou dissate 14 d’abriéu 2012 dins la salo istourico dis Estat de Prouvènço à-z-Ais, l’assemblado generalo de la Mantenènço de Prouvènço dóu Felibrige en presènci dóu Capoulié Jaque Mouttet, dóu Baile Jan-Marc Courbet, d’uno dougeno de Majourau e de quasimen cènt-cinquanto Felibre-Mantenèire.
-Estènt que lou Majourau Miquèu Benedetto, fai dous mes, avié pèr de resoun persounalo, demissiouna de sa cargo de Sendi, segound l’article 68 de l’estatut felibren, èro lou Majourau Gui Revest, Souto-Sendi lou pus einat (valènt-à-dire que soun eleicioun coume souto-sendi es la mai anciano) que presidavo l’acamp. Dins soun introuducioun diguè li gramaci dóu Burèu mantenenciau au Majourau Miquèu Benedetto pèr li servìci qu’a rendu à la Mantenènço de Prouvènço. La salo faguè alor restounti uno vertadiero ouvacioun.
-Après l’aproubacioun dóu verbau de l’acamp de 2011 à-n-Agai, lou raport mourau, lou raport generau d’ativeta e di souto-sendi relarg pèr relarg, lou raport financié, tóuti brihantamen adóuta, vengué lou moumen de l’eleicioun dóu Sendi. Se faguè, segound la lèi felibrenco, à buletin secrèt e es lou Majourau Gui Revest (soulet candidat) qu’es esta elegi à la quasi unanimeta. Tout d’uno, après de long picamen de man, emé bate cor, diguè lou grand ounour que ié fasien li Felibre de l’agué elegi Sendi de Prouvènço e si pensado anèron tout d’un tèms de-vers sa famiho, soun espouso e lou regreta Majourau Gui Giraud. Sènso espera parlè dis amiro d’aveni e coume vesié l’ourganisacioun de soun Burèu. Un Burèu que, de dela li Souto-Sendi, quatecant presentè ansin alarga : Secretairis : Rousselino Martano ; Clavaire : Alan Guiony ; secretairis-ajouncho encargado de l’enfourmati : Bregido Dempton ; Carga de messioun pèr lis estùdi particulié : Gerard Pascal ; encarga de Tafort : Reinié Martel ; encarga de l’Armana : Alan Guiony. Se passé pièi à l’eleicioun dóu Souto-Sendi renouvelable pèr lis Aup (lou Mantenèire Reinié Martel fuguè tournamai elegi), à l’eleicioun di delega pèr l’acamp dóu Counsèu Generau dóu Felibrige que se tendra à la Santo-Estello venènto à Sant-Iriès, i proujèt e au buget previsiounau 2012 e i questioun diverso.
Revenié au Capoulié de prendre la paraulo. Adreissè si gramaci au Majourau Miquèu Benedetto que sièis an de tèms tenguè l’empento de la Mantenènço e l’assegurè de soun soustèn e de soun amista.
-Pièi de persegui : « Venès d’elegi à la tèsto de vosto Mantenènço lou Majourau Gui Revest e ié dirai sènso langui tóuti mi coumplimen e tóuti mis encourajamen pèr l’obro que l’espèro ». Dins l’envanc, i’espingoulè l’estello d’argènt di sèt rai, ensigne di Sendi e li felibre de pica di man tant e pièi mai.
-E lou Capoulié de countunia : « Gui Revest lou counèisse bèn, es un travaiaire, es un menaire, es ourganisa, a d’idèio e pènse de-bon que la Mantenènço es dins de bòni man. Vole pamens pas n’en dire trop sus éu que sa moudestio n’en patirié ».
« Mai me dirés, es Clavaire dóu Felibrige e o, e es justamen pèr acò que lou counèisse bèn e que sabe si qualita. Sian dins uno periodo transitòri e fau assegura, meme se pèr principe lou cumul di founcioun agrado gaire, rèn enebis aquelo situacioun. Fau vèire davans tout lou bon founciounamen de nosto assouciacioun.
-Bèn segur que n’avèn parla, e m’a assegura qu’avié li capacita pèr teni targo. Alor i’a pas de secrèt, pèr l’ouro, lou Capoulié, en ié semoundant touto sa recouneissènço, mantendra lou Majourau Gui Revest à la founcioun de Clavaire dóu Felibrige. »
-Enfin lou Capoulié saludè lou devouamen dóu Burèu, evouquè li relacioun entre la Mantenènço e lis Escolo, lou role di Souto-Sendi e acabè emé de paraulo d’enavans.
-Ero miejour e miejo passa quouro s’es turta lou got de l’amista à l’entour d’un requist aperitiéu pourgi pèr la Vilo de z-Ais.
