Maiano 11 de setèmbre 2011

Maiano


Davans lou cros dóu Mèstre

11 de setèmbre 2011

Tourna-mai agroupa davans la capoucho blanquinello, à l’óucasioun de l’anniversàri de vosto prouvidencialo espelido, voudriéu vuei, Mèstre, talamen n’avèn aquest an avaloura lou pes, lausa, enaura la bello e necito noucioun de fraternita qu’avès majamen sachu encoura au pople nostre e au mounde.

La Santo-Estello di Santo d’en proumié, nous tanquè de-founs dins la pensado e l’esperit de vòsti disciple d’Arbaud e Baroncelli, valènt-à-dire dins soun acioun touto pastado de leiçoun de counsideracioun, de councòrdi, dóu viéure ensèn, de pas e de siau.
-Pièi dous evenimen que s’encapèron lou meme jour, lou 16 d’avoust passa, un oumenage à Louis-Guihaume Fulconis à Sant-Estève de Tineo e lou Cinquantenàri de la foundacioun de l’Escolo dóu Po à Crissolo, marquèron proun l’obro d’amista que n’en fuguerias l’autour e que n’en moustrerias lou camin.
-Emé l’oumenage que lou municipe de Sant-Estève a vougu rèndre à Louis Guihaume Fulconis, celebravian l’amista e la fraternita simboulisado pèr la Coupo. La Coupo que counmemoro uno pountannado significativo de nosto istòri e que marco un moumen di mai pregound de l’espitalita prouvençalo e felibrenco. La Coupo simbèu perfèt de l’amista e de l’ajudo nous ramento de-longo voste evangèli. D’efèt, de dela li liame que represènto la Coupo entre li dous pendis di Pirenèu, óujèt precious e venera, es lou simbole universau de la fraternita et de l’espitalita que de-longo nous tèn lou cor aut. De sa conco sourgenton la couneissènço de l’egalita, de la liberta, de la fidelita, de l’esperanço e de l’umanisme, i’entendèn murmureja vosto venerablo voues : Ah ! Se me sabien entèndre ! Ah ! Se me voulien segui !
A quàuquis estirado de Sant-Estève de Tineo, à l’image de ço que represènto la Coupo se festejè lou cinquantenàri de la foundacioun de l’Escolo dóu Po, se celebrè l’amista e la freirié entre dous pople, s’es ramenta qu’en 1961 d’ome afouga sagelèron l’amista e la fraternita au travès d’uno assouciacioun felibrenco ligant li dous pendis dis Aup, que pèr lou proumié cop li Piemountés faguèron cachiero i Prouvençau coume mai que d’un cop lou faguèron li Catalan.
-Aviéu carga lou Majourau Lucian Durand de veni dins li piado de nòsti davancié e mescla lis aigo de Rose à-n-aquéli dóu Po parieramen à la ceremounié esmouvènto que faguèron li Bonnet, li Jouveau, li Pons e li Rostaing lou 14 d’avoust de 1961 e de deliéura moun message :
« Avès avaloura lou pes de tout ço que represènto aquelo foundacioun de l’Escolo dóu Po : l’amista, li liame e dirai meme li sentimen d’amour e de fraternita dins l’èime mistralen qu’estacon nòsti pople. Aquelo voulounta de celebra la foundacioun de l’Escolo dóu Po significo rèn voulé renega, serva la memòri, persegui l’obro primadiero, es un oumenage pregound i davancié, i Sòci dóu Felibrige Gaetano di Sales, Corrado Grassi, Aldo Daverio e Gustàvi Buratti qu’an draia lou camin e qu’an de-bon coumpli obro piouso.
-Aquelo counmemouresoun es tambèn lou signe de l’estacamen au terraire e à si valour vertadiero, es countribuï au coumbat pacifi qu’es lou nostre despièi 157 an pèr enaura ço qu’apelan lou Bèu e lou Verai. Un bèn di mai precious qu’avèn pas lou dre de vèire disparèisse au proufié d’uno civilisacioun aceptisado, unifourmisado e vuejo de touto referènci. …
D’aqueste moumen, en pensado e en coumunioun emé tout aquéli qu’èron presènt au rescontre de 1961, perpensan à l’ideau que li butavo à l’endavans. En foro di gouvèr, en foro de touto poulitico, se coungreiavo l’idèio d’uno Europo di pople, uno afetivo unioun latino coume la pantaiè Frederi Mistral en s’assetant sus la realita indisputablo de la freiresso di lengage.
-La foundacioun de l’Escolo dóu Po fuguè un eisèmple, un proujèt remirable, la marco d’un prougrès de l’idèio felibrenco au travès di valèio aupino, durbiguè de nouvèlli relacioun au Felibrige prouvençau e coumpliguè uno obro coumuno e fermo pèr l’aparamen de la lengo nosto e de l’Idèio.
-A Sant-Estève de Tineo, au travès de l’oumenage rendu à Guihaume Fulconis, e à Crissolo emé lou cinquantenàri de la foundacioun de l’Escolo dóu Po, parieramen, celebran la freirejacioun, uno freirejacioun entre Prouvènço e Piemount, entre Prouvènço e Catalougno, valènt-à-dire dis « Aup i Pirenèu e la man dins la man », tóuti liga e uni dins la generousita e l’esperanço que s’atrobon, à la belesso, encarnado dins lou cap d’obro qu’es la Coupo. »
-Vous sian devènt, Mèstre, d’aguè coungreia aquéli liame, aquelo coumunioun, aquel amour dis ome, rèsto aro de nous nourri d’aquélis àuti jouïssènço que se trufon dóu toumbèu.
-Nous revèn, coume revèn à la civilisacioun, de bouta dins la lus, la freirejacioun, l’unioun, l’amista, la councòrdi, la pas e l’ideau de vido qu’avès jamai decessa de semena, de prouclama, de proufessa.
-La fidelita esperitalo e mouralo nous forço à buta, à reüssi, à trelusi.

Mèstre, à l’image dóu plus bèu di simbèu de freirejacioun e de coumunioun qu’es la Coupo, vaqui, ço que cresèn, ço qu’emplouran vuei souto noste cèu ; davans vous.

Jaque MOUTTET
Capoulié dóu Felibrige

Cet article a été publié par

© Le Felibrige Tous Droits réservés | Réalisation Dream Media® 2016 - Mentions légales et crédits